Wednesday, July 22, 2015

ஈஸியா பேசலாம் இங்கிலிஷ்!

ஈஸியா பேசலாம் இங்கிலிஷ்!
சின்ன ஐடியா... பெரிய லாபம்!
‘‘இங்கிலீஷ் பேசறது பெரிய விஷயமில்லை. அதை சரியா பேசணும்!’’ என்ற கருத்தையே அடிக்கடி வலியுறுத்தும் அனந்த சாய், ஆங்கில கல்விப் பணியில் சீனியர் லெக்சரராக இருந்து ஓய்வு பெற்றவர். பள்ளிகளில் ஆங்கிலம் கற்றுத் தரும் ஆசிரியர்களுக்கே பயிற்சி தந்தவர். இவர் எழுதிய ஆங்கிலப் பாடங்கள் ஆசிரியர் பயிற்சி மாணவர்களுக்கு பாடமாக இருக்கிறது. தமிழிலும் சரளமாக எழுதும் அனந்த சாய், ‘‘ ரொம்ப ஈஸியாக இங்கிலீஷ் பேச வெச்சிடறேன்’’ என்ற உறுதியோடுதான் பேனா பிடித்து களம் இறங்கியிருக்கிறார். குரு வணக்கத்தோடு தொடங்குவோம்!
‘‘கு ட் மார்னிங் மேம்!’’
தோட்டத்துச் செடிகளுக்கு நீர் ஊற்றிக் கொண்டிருந்த உஷா மேம் தலை நிமிர்ந்து பார்த்தார். பக்கத்து காம்பவுண்ட் சுவர் அருகே வித்யா!
‘‘ஹாய் வித்யா... குட்மார்னிங்! காலேஜ் லைஃப் எப்படி இருக்கு?’’
வித்யா, பட்டப்படிப்பு முதலாம் ஆண்டு மாணவி. உஷா மேம் பணியாற்றும் கல்லூரியில்தான் படிக்கிறாள்.
‘‘எப்படியோ போகுது மேம்...’’
கேட்டதுமே உஷா மேம் முகம் சுருங்கி விட்டது. வித்யா அருகில் வந்து, ‘‘என்ன கஷ்டம் உனக்கு?’’ என்றார்.
‘‘எல்லா பாடமும் இங்கிலீஷ்லயே நடக்குது. என்னால பிக் அப் பண்ண முடியல. பொண்ணுங்ககூட ஈக்வலா இங்கிலீஷ்ல பேசவும் வரல!’’ - வித்யா கவலையோடு சொல்லிக்கொண்டிருக்கும்போதே, மேம் வீட்டு மாடியில் குடியிருக்கிற கோமதி அங்கே வந்தாள்.
‘‘ஆன்ட்டி, வித்யா சொல்லிட்டிருந்ததை நானும் கேட்டேன். எனக்குக்கூட இந்த இங்கிலீஷ் தகராறு பண்ணுது. என் ஷிவானி குட்டி படிக்கிற ஸ்கூல் மிஸ்களோட இங்கிலீஷ்ல பேசணும்னு ஆசை!’’ என்று தானும் ஒரு அப்ளிகேஷன் போட்டாள்.
‘‘ஓகே. கவலையை விடுங்க. இனி உங்களை இங்கிலீஷ் பேச வைக்கறதுதான் என்னோட வேலையே!’’ என்ற உஷா மேம், ‘‘வசமா சிக்கிட்டீங்க. ஒரு வழி பண்ணிடறேன்’’ என்று சொல்லி சிரிக்க, திடீரென்று வித்யாவுக்கு ஒரு சந்தேகம்!
‘மேம்! நான் ஃபீஸ் கட்டி ஒரு வாரம் ஆச்சு. எப்ப ரிஸிப்ட் குடுப்பாங்க?’’ என்றாள்.
‘‘கம்ப்யூட்டர்ல ஏதோ ப்ராப்ளம். சீக்கிரமே கொடுத்துடுவாங்க!’’ என்ற உஷா மேம், ‘‘ஆமா, நீ என்ன சொன்னே? ரிஸிப்டா? அப்படி சொல்லக் கூடாது வித்யா. ‘ரிஸீட்’னுதான் சொல்லணும். அதாவது, receipt p ’-க்கு சவுண்ட் இல்லை. ஸைலன்ட்!’’ என்றார். தொடர்ந்து, ‘‘ரொம்ப பேருக்கு இதுதான் பிரச்னை. இங்கிலீஷ்ல பேசுவாங்க. ஆனா, உச்சரிப்புல தப்பு பண்ணி, கேலிக்கு ஆளாவாங்க. நீங்க இதுல உஷாரா இருக்கணும்’’ என்று மேம் சொல்லிக் கொண்டிருக்கும் போது, அங்கே ஓடி வந்தாள் கோமதியின் குட்டிப்பெண் ஷிவானி.
‘‘ஹாய், ஷிவானி! புதுசா என்ன ரைம் கத்துக்கிட்டே?’’ என்று அவள் தாடையைப் பிடித்து உஷா மேம் கொஞ்ச, குழந்தை சட்டென்று ‘ Johny Johny yes, papa... ” என்று ஆரம்பித்தது, அதற்கே உண்டான மழலையில்.
‘‘பாத்தியா, வித்யா! எவ்வளவு சரளமா சொல்லுது, ஷிவானி குட்டி! ஸ்கூல்ல நர்ஸரி ரைம்ஸ் சொல்றதே நாக்கு சரியா புரள்றதுக்குத்தான். நீங்க ரெண்டு பேரும் வீட்டுக்குப் போனதும் முதல் வேலையா ரைம்ஸ் சொல்லிப் பாருங்க!’’
வித்யா சிரிக்கவும், ‘‘என்ன சிரிக்கிறே! பெரியவங்ககூட சொல்லலாம். அப்புறம் tongue twisters தர்றேன். அதையும் ப்ராக்டீஸ் பண்ணுங்க.’’ என்றார் (உஷா மேம் கொடுத்த அந்த ஹோம் வொர்க், பெட்டியில்).
‘‘முதல் நாளே உங்களை பயமுறுத்தக் கூடாது. இருந்தாலும், தள்ளிப் போடாம பாடத்தை ஆரம்பிச்சுடறதுதான் பெட்டர்’’ என்ற உஷா மேம், ஓர் ஓரமாக நிழல் பார்த்து அமர, பக்கத்தில் அமர்ந்தனர் அவர்களும்.
‘‘மேம், முதல்ல இங்கிலீஷ்ல பேச்சை ஆரம்பிக்கறதுலயே எனக்கு தகராறு இருக்கு. அதுவே முதல் பாடமா இருக்கட்டுமே’’ என்று வித்யா சொல்லவும், உஷா மேம் ஆரம்பித்தார்...
‘‘இரண்டு பேர் சந்திக்கிறப்ப யார் முதல்ல பேசறதுங்கறதுல தயக்கம் இருக்கும். குறிப்பிட்ட ஒரு விஷயத்துக்காகப் பேசப் போறோம்னா அதுக்கான keywords வெச்சுக்கிட்டு பேசத் தொடங்கிடலாம். பொதுவா, பேசணும்னா எல்லாரையும் பாதிக்கிற தலைப்புகள் இருக்கு. வானிலை, புது சினிமா, டிராஃபிக், ஆபீஸ், குழந்தைகள்... இப்படி சொல்லிட்டே போகலாம். இப்ப மழையும் ஒரு டாபிக்தான். செம மழை பெய்திருக்கு இல்லியா? இதை வெச்சே, ‘ Very bad weather, isn’t it? ’னு ஆரம்பிச்சா, எதிர்ல இருக்கிறவர் பதில் சொல்லியே தீரணும்! அதேமாதிரி, தியேட்டர்ல சினிமா பார்க்கப் போயிருப்போம். நம்மை முறைச்சுக்கிட்டு ஒரு லேடி நிப்பா. நமக்கும் பொழுதுபோகணும். அவங்ககிட்ட, ‘ Have you seen this actor’s other films? ’னு நாம ஆரம்பிச்சா, அந்த லேடி நமக்கு ரொம்ப நாள் பழக்கம் மாதிரி பேச ஆரம்பிச்சுடுவா! இந்தக் கேள்விகளை அமைக்கறதுக்கு auxiliary verbs... அதாவது, துணை வினைச் சொற்கள் அவசியம்..’’ என்ற மேம், அந்த auxiliary verbs -ஐ வித்யாவிடமிருந்த நோட்டில் இப்படி எழுதினார்...
Auxiliary verbs
Be verb : am, is, was, are, were
Do verb : do, does, did
Perfect verb : have, has, had
Modal verb : shall, should, will, would, can, could, may, might
‘‘இந்த நாலு வரிசையும் ரொம்ப முக்கியம். கேள்வி எந்த வரிசை verb ல இருந்து வருதோ, அதே வரிசை verb ல பதில் சொல்றதுதான் மரபு. கோமு... இப்ப, ‘ Do you understand? ’னு நான் கேக்கறேன். நீ என்ன பதில் சொல்வே?’’
“Yes, I understand!” என்றாள் கோமதி.
‘‘அதை ‘Yes, I do னு சொல்லு. இல்லேனா ‘ No, I don’t’ னு சொல்லு. இன்னொரு கேள்வி. Have you seen Majaa? ’’
கோமதி சிரித்தாள். ‘ ‘Yes, I have.
‘‘இப்படி ‘ Yes. I have ’னு பதில் சொல்றப்ப auxiliary verb க்கான சுருக்கமான வடிவத்தை சொல்லணும். அதாவது, ‘ Yes, I’ve ’ னு (யெஸ், ஐ’வ்) சொல்லணும்’’ என்ற மேம், ‘‘கோமு! நான் உட்கார்ந்தாகூட இனிமே நீ உட்காரமாட்டே! ஏன்னு எனக்குத் தெரியும்!’’ என்று கிண்டலடித்தாள்.
‘‘ஆமா, ஆன்ட்டி! டி.வி சீரியல் டைம் இப்ப!’’ என்று எழுந்தாள் கோமதி.
‘‘ரைட்! நம்ம அடுத்த க்ளாஸ்ல, நீ பாக்கற சீரியல் கதையை எனக்கு இங்கிலீஷ்லயே சொல்றே. அப்ப wh ஐ வெச்சு கேள்வி கேக்கறே. ஓகே-வா?’’
‘‘ஓகே. ஆன்ட்டி!’’
- கத்துக்கலாம்

மாதவிலக்கை தள்ளிப் போட ஆரோக்கியமான வழி! ‘மூலிகை மூதாட்டி’ கல்யாணி சுவாமி!!

‘மூலிகை மூதாட்டி’ கல்யாணி சுவாமி
மாதவிலக்கை தள்ளிப் போட ஆரோக்கியமான வழி!
சி ல பெண்களுக்கு நேரம் காலம் தப்பி மாதவிலக்கு வர்றதுண்டு. மறுநாள் வீட்டுல விசேஷம் இருக்க, திடீர்னு விலக்காகிட்ட பொண்ணுங்க ரொம்பவும் டென்ஷன் ஆகிடுவாங்க. அந்தப் பிரச்னையை சரி பண்ணக்கூடிய அருமருந்து ‘சப்ஜா விதை’!
இந்த சப்ஜா விதை நாட்டு மருந்துக் கடைகள்ல கிடைக்கும். இதை வாங்கிட்டு வந்து, ராத்திரி கால் டம்ளர் தயிர்ல ஒரு டீஸ்பூன் சப்ஜா விதையை ஊறப் போட்டு, மறுநாள் காலையில வெறும் வயித்துல சாப்பிட்டா உடனடியா பலன் கிடைக்கும். ரத்தப்போக்கு நிக்கும்.
ந்தது நிக்கறதுக்கு மருந்து சொன்னேன். வரப் போறதைத் தள்ளி வைக்கறதுக்கும் மருந்து இருக்கு. எங்க காலத்துல நாள் கிழமை, பண்டிகை சமயத்துல எங்களுக்கு ‘தூரத்துக்கு நாள்’ வந்துட்டா என்ன செய்வோம் தெரியுமா?! இப்போல்லாம் தூரம் தள்ளிப் போக கண்ட கண்ட மாத்திரைகளை சாப்பிட்டு உடம்பை கெடுத்துக்கறாங்களே... அந்த ஜோலியே கிடையாது! இந்த சப்ஜா விதை - தயிர் கலவையை சாப்பிட்டு, ரெண்டு மலை வாழைப்பழத்தை சாப்பிட்டு, ஒரு டம்ளர் தண்ணியைக் குடிச்சுட்டு, அடுத்த வேலையைப் பார்க்கப் போயிடுவோம். கேரண்ட்டியா அன்னிக்கு மாதவிலக்கு ஆகாது!
தூரத்தைத் தள்ளிப் போட, இன்னொரு சூப்பரான - ஆரோக்கியமான வழி இருக்கு! காலையில வெறும் வயித்துல கைப்பிடி பொட்டுக்கடலையை (பொரி கடலை) மென்னு தின்னு, ஒரு டம்ளர் பச்சைத் தண்ணி குடிங்க. அதுக்கப்புறம் ஒரு மணி நேரம் கழிச்சுத்தான் காப்பியோ, டீயோ எதுவானாலும் குடிக்கணும். அப்படிச் செஞ்சா கட்டாயம் அன்னிக்கு மாதவிலக்கு வராது. இப்படியே அஞ்சாறு நாள் கூட மாதவிலக்கைத் தள்ளிப் போடலாம். உடம்பை பாதிக்காத எளிய வழி! கூடவே, உடம்புல புரோட்டீன் சத்தும் சேரும்!
சி ல சமயம் ‘சீக்கிரமே மாதவிலக்கு வந்துட்டா தேவலை’னு நினைச்சா, அதுக்கும் ஒரு கை வைத்தியம் இருக்கு!
கொஞ்சம் எள்ளையும் வெல்லத்தையும் சேர்த்துத் தின்னுங்க. பலன் நிச்சயம்! எள், வெல்லம் ரெண்டுமே சூட்டைக் கிளப்பிவிட்டு, மாதவிலக்கையும் வர வச்சிடும். அதே மாதிரி, கொஞ்சம்போல (ஒரு இணுக்கு) கற்பூரத்தை வெத்திலையில வச்சுத் தின்னாலும், சீக்கிரம் தூரமாகிடலாம். அதுவும் இல்லைன்னா, இஞ்சிச் சாறுல நிறைய வெல்லம் கலந்து வெறும் வயித்துல குடிச்சாலும் பலன் கிடைக்கும்.
- இன்னும் சொல்றேன்...

Monday, July 20, 2015

65 வயதில் மெடிக்ளெய்ம் பாலிசி எடுக்க முடியுமா?

65 வயதில் மெடிக்ளெய்ம் பாலிசி எடுக்க முடியுமா?
{?}என் வயது 65. என் மருத்துவச் செலவுகள் அதிகமாக இருக்கிறது. மெடிக்ளெய்ம் பாலிசி எடுக்க முடியுமா?
சேகர், நாகர்கோவில்.
பாகுபலி, ஆலோசகர், ஸ்டார் ஹெல்த் இன்ஷூரன்ஸ்.
‘‘நீங்கள் மூத்த குடிமக்களுக்கான இன்ஷூரன்ஸ் பாலிசியை எடுக்க லாம். எல்லா பொதுக் காப்பீட்டு நிறுவனங்களும் இந்த பாலிசியை விநியோகம் செய்கின்றன. இன்ஷூரன்ஸ் நிறுவனத்தைப் பொறுத்து, பாலிசியின் நிபந்தனைகள் மாறுபடலாம். நீங்கள் செலுத்துகிற பிரீமியத்துக்குத் தகுந்த மாதிரி சிறந்த பாலிசியைத் தேர்வு செய்துகொள்ள முடியும்.”
{?}எனக்கு சென்னையை அடுத்த தாம்பரத்தில் ஒரு வீடு இருக்கிறது. அந்த வீட்டை விற்று கிண்டியில் ஒரு வீடு வாங்கலாம் என்று இருக்கிறேன். நான் மூலதன ஆதாய வரி கட்ட வேண்டுமா?
ராம், தாம்பரம்.
கே.ஆர். சத்தியநாராயணன், ஆடிட்டர், ஜி.வி.என். சங்கர் அண்ட் கோ.
‘‘நீங்கள் தாம்பரத்திலிருக்கும் வீட்டை விற்று, கிண்டியில் வீடு வாங்கும்போது மூலதன ஆதாய வரி கட்ட வேண்டியதில்லை. ஆனால், சில விதிமுறைகளை அனுசரிக்க வேண்டும். தாம்பரத்தில் இருக்கும் வீட்டை வாங்கிய மூன்று வருடங்களுக்குள் அதை விற்க நேரிட்டால், அதற்கு குறுகிய மூலதன ஆதாய வரி செலுத்த வேண்டியிருக்கும். உதாரணத்துக்கு, ஜூலை 30, 2012-ல் வீட்டை வாங்கி, ஜூலை 14, 2015-க்குள் விற்று இருந்தால், குறுகிய கால மூலதன ஆதாயம், வருமானத்துடன் சேர்க்கப்பட்டு, அதற்கு வரி செலுத்த வேண்டும். அப்படி இல்லாமல், தாம்பரத்தில் வாங்கப்பட்ட வீடு மூன்று வருடங்களுக்குமேல் ஆகியிருந்தால், அதை விற்று வரும் தொகையைக் கொண்டு நீங்கள் கிண்டியில் வீடு வாங்கும்போது, உங்கள் பெயரில் இன்னொரு வீடு சொந்தமாக இருந்தாலும் வரிச் சலுகை கிடைக்கும். ஒருவேளை நீங்கள் புதிதாக வாங்கப்போகும் வீட்டையும் சேர்த்து இரண்டு வீட்டுக்குமேல் உங்களுக்குச் சொந்த வீடு இருந்தால், நீங்கள் வீட்டை விற்ற மொத்த தொகைக்கும் மூலதன ஆதாய வரி கட்ட வேண்டும்.’’
{?}சமீபத்தில் ஜீவி(GV) ஃப்லிம்ஸ் நிறுவனம் மூலதனத்தைக் குறைத்திருக்கிறது. இதனால் பங்கு வர்த்தகத்தில் ஈடுபடு பவர்களுக்கு எதாவது லாபம் / நஷ்டம் இருக்கிறதா?
பச்சையப்பன்.
எம்.எஸ்.ஓ. அண்ணாமலை, பங்கு தரகர், சேலம்.
‘‘ஜீவி ஃப்லிம்ஸின் பங்குகள் மிக அரிதாகத்தான் மும்பை பங்குச் சந்தையில் வர்த்தகமாகிறது. மேலும், இந்த நிறுவனப் பங்கின் முக மதிப்பு குறைந்திருப்பதால், இந்த நிறுவனத்தின் பங்குகளை வைத்திருப்பவர்களுக்கு லாபம் கிடைக்க வழியில்லை. சில ஆண்டு் களாக இந்த நிறுவனம் நஷ்டம் கண்டு வருவதால், ஏதாவது புதிதாக நடந்தால்தான் லாபம் கிடைக்கலாம்.”
{?}நான் கத்தாரில் வேலை செய்யும்   எனக்கு இப்போது வயது 28. எனக்கு ஏற்ற மியூச்சுவல் ஃபண்ட்  மற்றும் பென்ஷன் திட்டங்களைக் குறிப்பிடவும்.
அழகப்பன், கத்தார்.
எஸ்.பாரதிதாசன், நிதி ஆலோசகர்.
‘‘உங்களுக்கு 28 வயதுதான் ஆகிறது. இந்த வயதிலேயே ஓய்வுக்கால முதலீடுகளைப் பற்றி  சிந்திக்கத் தொடங்கி இருப்பது சரியான விஷயமே. நீங்கள் 60 வயதில் ஓய்வு பெறப் போகிறீர்கள் என்றும், அப்போது சராசரியாக ஆண்டு பணவீக்கம் 7 சதவிகிதமாக இருக்கும் என வைத்துக் கொள்வோம். இதைக் கருத்தில் கொண்டே உங்களின் 80 வயது வரைக்குமான தேவைகளை பூர்த்தி செய்கிற மாதிரி முதலீட்டைத் தீர்மானிக்க வேண்டும்
ஈக்விட்டி ஃபண்டுகளில்  நீண்ட காலத்துக்கு முதலீடு செய்வதே உங்களின் ஓய்வுக்காலத்தை வளமாக மாற்ற போதுமானதாக இருக்கும். உங்களின் இன்றைய மாத செலவு ரூ.30,000 என தோராயமாக எடுத்துக் கொண்டால், 7% பணவீக்க விகிதத்தில் உங்களுக்கு 60 வயதில் ரூ.2.61 லட்சம் மாத செலவு இருக்கும். 80 வயது வரை வாழ்வீர்கள் என்கிற கணிப்பில் ரூ.5.72 கோடி தொகுப்பு நிதி வேண்டும். ஆண்டுக்கு 15% வருமானம் தரக்கூடிய ஈக்விட்டி ஃபண்டுகளில் மாதம் ரூ.6,120 வீதம் 32 ஆண்டுகளுக்கு முதலீடு செய்து வந்தால் போதும்.”
{?}நான் எஸ்ஐபி முறையில் மியூச்சுவல் ஃபண்டில் முதலீடு செய்யலாம் என்று இருக்கிறேன். 15-லிருந்து 18 வருடங்கள் கழித்து, எனக்கு ரூ.1.5 கோடி திரும்பக் கிடைக்க வேண்டுமானால், நான் எவ்வளவு முதலீடு செய்ய வேண்டும்?
ரவிச்சந்திரன், பெரம்பலூர்.
தா.முத்துகிருஷ்ணன்,  வைஸ் வெல்த் அட்வைஸர்ஸ்.
‘‘இன்றிலிருந்து 18 வருடத்துக்குள் ரூ.1.5 கோடி வேண்டும் என்று வைத்துக்கொள்வோம். நீண்ட கால முதலீட்டில், நல்ல ஈக்விட்டி ஃபண்டுகள் 18 சதவிகிதம் வரை வருடாந்திர வருமானம் தரக்கூடியவை. மாதம் ரூ10,000 வீதம் எஸ்ஐபி முறையில் 18 வருடங் களுக்கு தொடர்ந்து முதலீடு செய்து வந்தால், உங்களின் இலக்கை அடைந்துவிடலாம். நீங்கள் பின்வரும் ஃபண்டுகளில் முதலீடு செய்யலாம். ஃப்ராங்க்ளின் இந்தியா பிரைமா பிளஸ் - ரூ.3,500. எல் அண்ட் டி  ஈக்விட்டி ஃபண்ட் - ரூ.3,500, சுந்தரம் செலக்ட்  மிட் கேப் - ரூ.3,000.’’

ஃபுட்பாய்சன் பற்றி பாரம்பரிய மருத்துவம் சொல்வது என்ன?

ஃபுட்பாய்சன் பற்றி பாரம்பரிய மருத்துவம் சொல்வது என்ன?
- ஆயுர்வேத மருத்துவர் சாந்தி விஜய்பால்.
“ஃபுட் பாய்சனில் நிறைய விதங்கள் இருக்கின்றன. எல்லாவற்றுக்கும் ஒரே மாதிரியான வீட்டு வைத்தியத்தை நாம் கொடுக்கக்கூடாது. பாதிப்பைப் பொருத்து வைத்தியம் செய்ய வேண்டும். வெயில் காலங்களில் ஐஸ் போட்ட ஜூஸ்களைக் குடிப்போம். சுத்தமில்லாத தண்ணீரில் தயாரிக்கும் ஐஸ், குல்பி போன்றவற்றால் கூட ஃபுட் பாய்சன் ஏற்படும். எந்த மருத்துவ முறையாக இருந்தாலும் வாந்தி, வயிற்றுப்போக்கை உடனடியாக நிறுத்தக் கூடாது. அப்படிச் செய்தால், கெட்ட கழிவுகள் உள்ளேயே தங்கி, உடலுக்குப் பெரிய பிரச்னையை ஏற்படுத்தும்” என்ற சாந்தி விஜய்பால், சில மருத்துவ முறைகளைச் சொன்னார். அவை இங்கே உங்களுக்காக...
வயிற்றுப் போக்குக்கான வீட்டு வைத்தியம்:
* சீரகத்தை வெறும் வாணலியில் கருப்பாக்கித் தீயும்  அளவுக்கு வறுத்துப் பொடி செய்து... ஒரு மணி நேரத்துக்கு ஒரு முறை கால் டம்ளர் மோரில் கலந்து குடிக்க வேண்டும்.

* சிலருக்கு வாந்தி வருவதுபோல தோன்றிக்கொண்டே இருக்கும். அதனால் எதுவும் சாப்பிட முடியாது.  அப்படி இருந்தால், ஒரு டேபிள்ஸ்பூன் தேனில் அதே அளவு எலுமிச்சைச்சாற்றைக் கலந்து அவ்வபோது நாக்கில் தடவினால் சரியாகும்.

* கோடையில் கிடைக்கும் மாம்பழம், பலாப்பழம் ஆகியவற்றை அளவுக்கு மீறி சாப்பிட்டாலோ, அல்லது சரியாகக் கழுவாமல் சாப்பிட்டாலோ அஜீரணம் ஏற்படும். இதனால் மலம் கழிக்கும்போது புளித்த வாடையுடன் நெஞ்சு எரிச்சலும் ஏற்படும். சீரகத்தையும் வெந்தயத்தையும் சம அளவு எடுத்து லேசாக வறுத்து பொடி செய்து தனியாக அரைத்து வைத்துக் கொள்ளவும்.  பசுநெய்யில் பெருங்காயக்கட்டியைப் பொரித்து வைத்துக் கொள்ளவும். ஒரு டீஸ்பூன் அரைத்த பொடியுடன் இரண்டு சிட்டிகை பெருங்காயக்கட்டியைக் கலந்து, பசுநெய்யில் கலக்கி ஒரு நாளைக்கு மூன்று வேளை சாப்பிட்டால், அஜீரணம் சரியாகும்.
* உடல் சூட்டினாலும் ஃபுட்பாய்சன் ஏற்படும். இதனால், அடிவயிற்றில் வலி அதிகமாக இருக்கும்.  வயிற்று வலியை உடனே குறைக்க நாமக்கட்டியை குழைத்து அடிவயிற்றில் தடவ வேண்டும். வயிற்றுப்போக்கும் ஏற்படலாம். ஒரு பிடி சீரகத்தை லேசாக வறுத்து,  ஒரு லிட்டர் தண்ணீரில் போட்டு லேசாகக் கொதிக்க வைத்துக் குடித்தால் உடல் சூடு தணியும்.

மாதுளம் பழத்தோலைக் காய வைத்துப் பொடி செய்து... ஒரு டேபிள்ஸ்பூன் பொடிக்கு ஒன்றரை டம்ளர் தண்ணீரை ஊற்றி கொதிக்கவைத்து குடித்தாலும் சூடு தணியும். சூடு உடம்புக்காரர்கள், அடிக்கடி இளநீர் குடிக்கலாம்.

மோரில் எலுமிச்சைச்சாற்றைப் பிழிந்து அதில் சிறிது ராக் சால்ட் (கடைகளில் கிடைக்கும்) கலந்து வெயில் காலங்களில் குடித்து வர உடல் சூடு தணியும். இது பித்தத்தையும் தணிக்கும்.

*ஒரே நேரத்தில் பல விதமான மாமிசங்கள் சாப்பிட்டாலும் ஃபுட் பாய்சன் ஏற்பட வாய்ப்புள்ளது. சிக்கனில் ஒரு விதமான புரோட்டீன் இருக்கும். மீனில் வேறுவிதமான புரோட்டீன் இருக்கும். மட்டனில் உள்ள புரோட்டீன் இன்னொரு தன்மையில் இருக்கும். ஒரே நேரத்தில் சிக்கன், மட்டன், மீன் என்று சேர்த்து சாப்பிட்டால் ஒவ்வாமை ஏற்படும். பாலுடன் முட்டையைக் கலந்து பிரெட் டோஸ்ட் சாப்பிடுவது;  மாமிசம் சமைக்கும் போது அதில் தயிர், பால் சேர்ப்பது ஆகியவையும் சிலருக்கு ஒவ்வாமையை ஏற்படுத்தும். இதனால் வயிறு உப்புசம் ஏற்படும். சிறிது இஞ்சியை நசுக்கி, இதில் கல்உப்பைச் சேர்த்து மென்றால் உப்புசம் சரியாகி விடும்.

பத்திய சமையல்! முருங்கை இலைப் பொடி!! சுண்டைக்காய்த் துவையல்!!!

பத்திய சமையல்
உடல் சார்ந்த பிரச்னைகளில் இருந்து நிவாரணம் அளிப்பதுடன், வருமுன் காக்கும் வழிமுறைகளை வசப்படுத்தவும் உதவும் உணவு வகைகள்  நம் பாரம்பர்ய சமையலில் கொட்டிக் கிடக்கின்றன. அவற்றில் சிலவற்றைத் தேர்ந்தெடுத்து, ஆரோக்கிய வாழ்வுக்கு அஸ்திவாரம் போடும் வகையில், இந்த `பத்திய சமையல்’ பகுதியில் வழங்கி வருகிறார் சமையல்கலை நிபுணர் எஸ்.ராஜகுமாரி. இந்த முறை அவர் அளிப்பது... சுண்டைக்காய்த் துவையல் மற்றும் முருங்கை இலை பொடி.
முருங்கை இலைப் பொடி
தேவையானவை:
சுத்தம் செய்த முருங்கை இலை - 2 கப்
எள் - 2 டேபிள்ஸ்பூன்
எண்ணெய் - 2 டேபிள்ஸ்பூன்
உப்பு - தேவையான அளவு
வறுத்துப் பொடிக்க:
காய்ந்த மிளகாய் - 2
பெருங்காயத்தூள் - ஒரு சிட்டிகை
உளுத்தம்பருப்பு - 3 டேபிள்ஸ்பூன்
செய்முறை:
வெறும் வாணலியில் எள்ளை வறுத்துத் தனியே வைக்கவும். பிறகு, அதே வாணலியில், ஒரு சிறிதளவு எண்ணெய் விட்டு வறுக்கக் கொடுத்துள்ளவற்றை வறுத்துப் பொடிக்கவும். மீதியுள்ள எண்ணெயை வாணலியில் ஊற்றி, முருங்கை இலையை வதக்கவும். மொட மொடப்பாக வந்ததும் இறக்கிவிடவும்.
மிக்ஸியில் எள்ளைப் பொடிக்கவும். இதனுடன் உப்பு, வறுத்த முருங்கை இலை சேர்த்து கொரகொரப்பாகப் பொடித்து... முன்பு செய்து வைத்த பொடியைச் சேர்த்து,  ஒரு சுற்று சுற்றி எடுத்தால்... முருங்கை இலை பொடி தயார். இதை காற்றுப்புகாத டப்பாவில் வைத்தால், ஒரு வாரம் வரை பயன்படுத்தலாம்.
பலன்கள் :
முருங்கை இலையிலும், எள்ளிலும் இரும்புச்சத்து நிறைந்துள்ளது. இது ரத்த விருத்திக்கு உதவும். ரத்த சோகையில் இருந்து நிவாரணம் அளிக்கும்.

சுண்டைக்காய்த் துவையல்
தேவையானவை:

 பிஞ்சு சுண்டைக்காய் - ஒரு கப் தேங்காய்த் துருவல் - 3 டேபிள்ஸ்பூன்
 நறுக்கிய கொத்தமல்லித்தழை - 3 டேபிள்ஸ்பூன்
 புளி - கொட்டைப்பாக்கு அளவு
 எண்ணெய் - 3 டேபிள்ஸ்பூன்
 உப்பு - தேவையான அளவு
வறுத்துப் பொடிக்க:
காய்ந்த மிளகாய் - 2
பெருங்காயம் - ஒரு சிட்டிகை உளுத்தம்பருப்பு - 2 டேபிள்ஸ்பூன்
செய்முறை:
வாணலியில் சிறிதளவு எண்ணெய் ஊற்றி வறுக்கக் கொடுத்துள்ள பொருட்களை வறுத்துப் பொடித்து தனியே வைக்கவும். அதே வாணலியில் மீதமுள்ள எண்ணெயை ஊற்றி  சுண்டைக்காயை வதக்கவும். வதங்கியதும் அதனுடன் உப்பு, புளி, தேங்காய்த் துருவல், கொத்தமல்லித்தழை சேர்த்து மிக்ஸியில் அரைத்து, பொடித்த பொடியைச் சேர்த்து, சிறிதளவு நீர் விட்டு மேலும் ஒரு சுற்று சுற்றி எடுக்கவும். இது சாதத்தில் போட்டுப் பிசைந்து சாப்பிடவும், இட்லி, தோசைக்குத் தொட்டுக்கொள்ளவும் ஏற்றது.
பலன்கள் :
சுண்டைக்காய், குடலில் உள்ள புழுக்களை அழிக்கும் ஆற்றல் கொண்டது. வயிற்றில் புழு இருந்தால் சரியாக சாப்பிட முடியாது. புண்ணும் ஏற்படும். இவற்றுக்கெல்லாம் சுண்டைக்காய்த் துவையல் கைகண்ட மருந்து.

வெஜிடபிள் பிரியாணி, மெனு ராணி செல்லம்!!

பக்கத்து வீடு!
மெனு ராணி செல்லம், சமையல்கலையில் 45 வருட அனுபவம் உள்ளவர். தமிழ்நாட்டில் முதன்முதலாக பெண்களுக்காக கேட்டரிங் இன்ஸ்டிடியூட்டைத் தொடங்கி வெற்றிகரமாக நடத்தி வருகிறார்.  டி.வி கறுப்பு வெள்ளையாக வந்த காலத்திலேயே, அதில் தோன்றி சமையல் நிகழ்ச்சிகளை வழங்கியவர். தற்போது எண்ணற்ற டி.வி ஷோக்கள், நாளிதழ்கள், மாத இதழ்களில் சமையல் ரெசிப்பிக்களைச் சொல்லித் தருகிறார். மியூசிக் கிராஜுவேட்டான தனக்கு ‘மெனு ராணி’ என்கிற பட்டத்தை ‘ஆனந்த விகடன்’ தந்தது என்று பெருமையோடு சொல்லும் இவர், பார்ட்டி ஸ்பெஷல் ரெசிப்பிக்களை இங்கே தந்துள்ளார்.

உருளைக்கிழங்கு பனீர் குருமா
தேவையானவை:

பனீர் - 400 கிராம் (மீடியம் சைஸ் துண்டுகளாக்கவும்)
உருளைக்கிழங்கு - ஒரு கிலோ  (மீடியம் சைஸ் துண்டுகளாக நறுக்கவும்)
வெங்காயம் - அரை கிலோ  (பொடியாக நறுக்கவும்)
தக்காளி - கால் கிலோ  (பொடியாக நறுக்கவும்)
முழுத் தேங்காய் - 1 (துருவி அரைத்து,  2 முறை பால் எடுக்கவும்)
முந்திரி - ஒரு கைபிடி (கரகரப்பாகப் பொடித்து முதல் தேங்காய்ப்பாலில் சேர்க்கவும்)
உப்பு - தேவையான அளவு
மஞ்சள்தூள் - கால் டீஸ்பூன்
கரம்மசாலாத் தூள் - ஒரு டீஸ்பூன்
மிளகாய்த்தூள் - 2 டீஸ்பூன்
தாளிக்க:
சோம்பு - அரை டீஸ்பூன்
பிரிஞ்சி இலை - ஒன்று
எண்ணெய் - கால் கப்
வெண்ணெய் - 2 டேபிள்ஸ்பூன்
அரைப்பதற்கு தேவையான மசாலாப் பொருட்கள்:
கசகசா - ஒரு டேபிள்ஸ்பூன்
இஞ்சி - ஒரு துண்டு
பூண்டு - 8 பல்
பச்சை மிளகாய் - 6
நறுக்கிய வெங்காயம் - ஒரு கைப்பிடி
பட்டை - 2 துண்டு
சோம்பு, மிளகு - தலா அரை டீஸ்பூன்
கொத்தமல்லித்தழை- ஒரு கைப்பிடி
அரைக்க வேண்டியதை எல்லாம் மிக்ஸியில் சிறிது தண்ணீர் விட்டு கெட்டியாக அரைத்து வைக்கவும்.
 தேங்காய் பால் எடுக்க:
தேங்காயைத் துருவி தண்ணீர் விட்டு மிக்ஸியில் அரைத்து, பின் ஒரு மெல்லியத் துணியில் பிழிந்து பால் எடுக்கவும். இதுதான் திக்கான முதல் பால். மீண்டும் ஒரு முறை தண்ணீர் விட்டு அரைத்துப் பிழிந்தெடுத்தால், இரண்டாம் பால் தயார்.
செய்முறை: அடுப்பில் ஒரு கனமான எண்ணெய் சட்டியை வைத்து எண்ணெய், வெண்ணெய் சேர்த்துச் சூடானதும் பிரிஞ்சி இலை, சோம்பு சேர்த்துத் தாளிக்கவும். இதில் வெங்காயத்தைச் சேர்த்து லேசாக வதங்க ஆரம்பிக்கும்போது, அரைத்த விழுதையும் சேர்த்து பச்சை வாசனை போக வதக்கவும். பிறகு நறுக்கிய உருளைக்கிழங்குத் துண்டுகளைச் சேர்த்து ஒரு நிமிடம் வதக்கி, இரண்டாம் தேங்காய்ப்பால், உப்பு, மிளகாய்த்தூள், மஞ்சள்தூள் சேர்த்து வேக விடவும். உருளைக்கிழங்கு முக்கால்பாகம் வெந்ததும், தக்காளியைச் சேர்த்து வேக விடவும்.  தக்காளி வெந்ததும் பனீர், கரம் மசாலாத்தூள் சேர்த்து பச்சை வாசனை போக கொதிக்க விடவும். இறுதியாக முந்திரி சேர்த்த முதல் தேங்காய்ப்பாலை விட்டு ஒரு கொதி வந்ததும், இறக்கிப் பரிமாறவும்.
குறிப்பு
பனீர் மொறுமொறுப்பாக இருக்க வேண்டுமானால், எண்ணெயில் பொரித்துச் சேர்க்கவும். மிருதுவாக வேண்டுமானால் அப்படியே சேர்க்கவும்.

 மெக்ஸிகன் டா கோஸ் (Mexican Taccos)
டாகோஸ் பூரி செய்யத் தேவையானவை:

மைதா - ஒரு கப்
மக்காச்சோள மாவு - ஒன்றரை கப்
எண்ணெய் - பொரிக்கத் தேவையான அளவு
உப்பு - தேவையான அளவு
தக்காளி சாஸ் - சிறிதளவு
சில்லி சாஸ் - சிறிதளவு
நீளமாக நறுக்கிய முட்டைகோஸ்  - சிறிதளவு
கொத்தமல்லித்தழை - சிறிதளவு (பொடியாக நறுக்கியது)
செய்முறை:
வாய் அகன்ற ஒரு பாத்திரத்தில் மைதா, மக்காச்சோள மாவு, உப்பு, தண்ணீர் சேர்த்து சப்பாத்தி மாவாகப் பிசைந்து வைக்கவும். மாவை சிறிய உருண்டைகளாக எடுத்து உருட்டி, மாவு தொட்டு மெல்லிய வட்டமாகத் திரட்டி, அதன் மேல் டூத்-பிக் அல்லது ஃபோர்க் வைத்து குத்தினால், மாவு எண்ணெயில் போட்டால் உப்பாது. அடுப்பில் வாணலியை வைத்து எண்ணெய் ஊற்றிச் சூடானதும், திரட்டி வைத்ததைச் சேர்த்துப் பொரித்தெடுக்கவும். மாவு லேசாக சிவக்க ஆரம்பிக்கும்போது, ஜல்லி கரண்டியால் வாணலியின் ஓர் ஓரத்தில் இதை நகர்த்தி, இரண்டாக மடிக்க வேண்டும். ஆனால், படகு வடிவத்தில் இருக்க வேண்டும். ரொம்பவும் அழுத்தினால், படகு வடிவம் கிடைக்காது. அப்படியே எண்ணெயில் காட்டி பொன்னிறமானதும், எடுத்து கிச்சன் டவலில் வைக்கவும். எண்ணெய் உறிஞ்சிய பின்பு டப்பாக்களில் வைத்து மூடி வைக்கவும்.
ஸ்டஃப்பிங் செய்ய:
ராஜ்மா - கால் கிலோ
வெங்காயம் - அரை கிலோ (ஸ்லைஸ்களாக நறுக்கவும்- சிறிது அலங்கரிக்க எடுத்து வைக்கவும்)
தக்காளி - கால் கிலோ (நீளமாக நறுக்கவும். அலங்கரிப்பதற்கு சிறிதளவு எடுத்து வைக்கவும்.)
உப்பு - தேவையான அளவு
மிளகாய்த்தூள் - 2 டீஸ்பூன்
கரம்மசாலாத் தூள் - ஒரு டீஸ்பூன்
எண்ணெய் - கால் கப்
வெண்ணெய் - ஒரு டீஸ்பூன்
செய்முறை:
ராஜ்மாவை இரவே தண்ணீரில் ஊற விடவும். காலையில், புதிதாக தண்ணீர் ஊற்றி, குக்கரில் வேக விட்டு ஆற விடவும். அடுப்பில் வாணலியை வைத்து வெண்ணெய், எண்ணெய் விட்டு சூடானதும், வெங்காயம் சேர்த்து பொன்னிறமாக வதக்கவும். இதில் உப்பு, மிளகாய்த்தூள், கரம்மசாலாத் தூள் சேர்த்து, சிறிது நேரம் வதக்கிய பின் தக்காளி சேர்த்து வதக்கவும். தக்காளி கரைந்ததும் வெந்த ராஜ்மாவை அந்த தண்ணீருடன் சேர்த்து தண்ணீர் சுண்டும் வரை வேகவைத்து மசித்து இறக்கவும்.

மெக்ஸிகன் டாகோஸ் செய்முறை

தயாரித்த ராஜ்மாவைச் சிறிது எடுத்து, டாகோஸ் பூரியின் உள்ளே வைக்கவும்.
அதன் மேல் நறுக்கிய பச்சை வெங்காயம், தக்காளித் துண்டுகளை தூவவும்.
தக்காளி சாஸ், சில்லி சாஸ் முதலியவைகளை தேவைக்கேற்ற அளவு ஊற்றவும்.
நறுக்கிய கொத்தமல்லித்தழை, கோஸ் முதலியவைகளைத் தூவிப் பரிமாறவும்.


வெஜிடபிள் பிரியாணி
தேவையானவை:
சாதம் செய்ய:
பிரியாணி அரிசி - 2 கப்
தண்ணீர் - 4 கப்
உப்பு - தேவையான அளவு
தாளிக்க:
ஏலக்காய், பட்டை, கிராம்பு - தலா 4
சோம்பு - ஒரு டீஸ்பூன்
பிரிஞ்சி இலை - 2
வெண்ணெய் - ஒரு டேபிள்ஸ்பூன்
செய்முறை:
அரிசியைக் கழுவி தண்ணீர் ஊற்றி, அரைமணி நேரம் ஊற வைக்கவும். கனமானஅடிப்பகுதியுள்ள பாத்திரத்தை, அடுப்பில் வைத்து, வெண்ணெய் சேர்த்து உருகியதும் சோம்பு, ஏலக்காய், பட்டை, கிராம்பு, பிரிஞ்சி இலை சேர்த்துத் தாளிக்கவும். ஊறிய அரிசியை தண்ணீர் இறுத்து இதில் சேர்த்து லேசாக வறுக்கவும். 4 கப் தண்ணீர் ஊற்றி, உப்புப் போட்டு மூடி போட்டு வேக விடவும். அரிசி வெந்து தண்ணீர் வற்றியதும், அடுப்பை அணைத்து பாத்திரத்தைக் கீழே இறக்கி வைக்கவும்.
காய்கறிகள் செய்யும் முறை:
கேரட், பீன்ஸ், பட்டாணி - தலா 100 கிராம்
காலிஃப்ளவர் - அரை பூ
குடமிளகாய் - 2
பெரிய வெங்காயம் - 2 (நீளமாக நறுக்கவும்)
பெங்களூர் தக்காளி - 4
எண்ணெய் - ஒரு டேபிள்ஸ்பூன்
உப்பு - தேவையான அளவு
சோம்பு - 1 டீஸ்பூன்
செய்முறை:
பட்டாணியை வேகவைத்துக் கொள்ளவும். வெங்காயத்தை நீளமாக நறுக்கிக் கொள்ளவும். கேரட், பீன்ஸை நீளமாக நறுக்கி ஆவியில் வேகவைத்துக் கொள்ளவும். குடமிளகாய், காலிஃப்ளவரை நீளமாக நறுக்கி வைக்கவும். அடுப்பில் வாணலியை வைத்து, வெண்ணெய் விட்டு சோம்பு போட்டு தாளித்து வெங்காயம், தக்காளி சேர்த்து நிறம் மாற வதக்கவும். இதில் குடமிளகாய், காலிஃப்ளவரைச் சேர்த்து சிறிது வதங்கியதும் கேரட், பீன்ஸ், உப்பு சேர்த்து காய்கறிகள் குழையாமல் வதக்கி இறக்கவும்.
மசாலா தயாரிக்க:
தயிர் - 2 கப்
உப்பு - தேவையான அளவு
மல்லித்தூள் (தனியாத்தூள்) - 2 டீஸ்பூன்
கரம்மசாலாத் தூள்- 2 டீஸ்பூன்
மிளகாய்த்தூள் - 2 டீஸ்பூன்
மஞ்சள்தூள் - ஒரு டீஸ்பூன்
ஏலக்காய், பட்டை கிராம்பு - தலா 2
இஞ்சி - ஒரு துண்டு
பூண்டு - 6
பச்சைமிளகாய் - 5-6
(இஞ்சி, பூண்டு, பச்சை மிளகாயை பேஸ்டாக அரைத்து, இதில் இருந்து 1 டேபிள்ஸ்பூன் தனியாக எடுத்து வைக்கவும்)
கொத்தமல்லித்தழை (நறுக்கியது) - அரை கப்
கழுவிய புதினா - ஒரு பிடி  தக்காளி - 6 (பொடியாக நறுக்கவும்)
செய்முறை: தயிரில் மேற்கண்ட அனைத்தையும் சேர்த்து ஒரு மணி நேரம் ஊற வைக்கவும்.
வெஜிடபிள் பிரியாணி செய்ய:
வாய் அகன்ற பாத்திரத்தை அடுப்பில் வைத்து, வதக்கிய காய்கறிகளைச் சேர்க்கவும். ஊறிய தயிர் கலவையையும் சேர்த்து சிம்மில் வைத்துக் கிளறவும். காய்கறிகள் குழைந்து போகக் கூடாது. மசாலாக்களில் உள்ள நீர் வற்றிய பிறகு அடுப்பை அணைத்து இறக்கவும்.
வாய் அகன்ற ஒரு தட்டில் பிரியாணி சாதத்தின்  ஒரு பகுதியைப் பரப்பி வைக்கவும். இதன் மேல் காய்கறிக் கலவையைப் பரப்பவும். இதன் மேல் வெந்த சாதம் என லேயர் லேயராகப் பரப்பி வைக்கவும். இனி அத்தனை லேயரையும் ஃபோர்க்கால் மெதுவாகக் கலக்கவும்.
தம் செய்யும் விதம்:
கிளறிய பிரியாணியை கனமான அடிப்பகுதியுள்ள பாத்திரத்தில் சிறிது நெய் தடவி சேர்த்து, குறைந்த தீயில் மூடி போட்டு ஐந்து நிமிடம் கழித்து மூடியைத் திறந்து பரிமாறவும்.


வெஜிடபிள் பனீர் கபாப்
தேவையானவை:
மசித்த உருளைக்கிழங்கு - 2 கப்
மசித்த காய்கறிகள், கடலை மாவு  - தலா 1 கப்
பொடி செய்யப்பட்ட பிரெட் துண்டுகள்  - ஒரு கப்
இஞ்சி, பூண்டு விழுது - ஒரு டீஸ்பூன்
ரஸ்க் (அ) பிரெட் தூள் - 2 கப்
உப்பு - தேவையான அளவு
மிளகாய்த்தூள் - 2 டீஸ்பூன்
கரம்மசாலாத்தூள் - ஒரு டீஸ்பூன்
புதினா - அரைக் கட்டு
எண்ணெய் - பொரிக்கத் தேவையான அளவு
பனீர் - அரை கப் (பாதி துருவியும், மீதியை கியூப்களாகவும் நறுக்கவும்)
தக்காளி - 1 (கியூப்களாக நறுக்கவும்)
பச்சை நிற குடமிளகாய் - 1  (கியூப்களாக நறுக்கவும்)
 பெரிய வெங்காயம் - 1  (கியூப்களாக நறுக்கவும்)
வேக வைத்து மசித்த காய்கறிகள் தயாரிக்க:
கேரட் - கால் கப்
பீன்ஸ், பட்டாணி, காலிஃப்ளவர் - தலா அரை கப்
செய்முறை:
தேவையானவற்றில் பிரெட் தூள் நீங்கலாக உள்ள மற்ற அனைத்தையும் (துருவிய பனீரை மட்டும் சேர்க்கவும்) ஒரு பவுலில் சேர்த்துப் பிசையவும். இதை ஒரு விரல் நீளத்துக்கு உருட்டி, பிரெட் தூளில் போட்டுப் புரட்டி எடுக்கவும். இதை எண்ணெயில் பொன்னிறமாகப் பொரித்தெடுத்து தனியாக வைக்கவும். கபாப் குச்சியில் வெங்காயம், தக்காளி, பொரித்த வெஜிடபிள் கபாப் என படத்தில் காட்டியிருப்பது போல அலங்கரித்து, டொமேட்டோ சாஸுடன் பரிமாறவும்.
வீட்டில், ‘பேக்கிங் அவன்’ வைத்திருப்பவர்கள் எண்ணெயில் பாதி வேக்காடு வெந்த வெஜிடபிள் கபாபை ஒரு தட்டில் வைத்து, ஃபுட் பிரஷ்ஷால் எண்ணெய் தொட்டு கபாப் மீது தடவவும். இதை கிரில் மோடில் வைத்து கிரில் செய்யலாம். வேகவிட்டு பின் கபாப் குச்சியில் குத்திப் பரிமாறலாம்.

சிக்கன் செட்டிநாடு, பஞ்சாபி ராஜ்மா, கிச்சன் அனுபவங்கள்! பார்ட்டி ஸ்பெஷல்!

செஃப் சஞ்ஜீவ் கபூர் கிச்சன் அனுபவங்கள்! பார்ட்டி ஸ்பெஷல்
ந்தியாவின் பிரபல செஃப் சஞ்ஜீவ் கபூர்... டி.வி ஷோக்களில் ரொம்பவே பிரபலம். இந்தியாவின் முன்னணி செஃப்களில் ஒருவர். இவர் தனது அனுபவங்களை, 'அவள் விகடன் கிச்சன்’ வாசகர்களுடன் பகிர்ந்து கொள்கிறார்.
''என் அம்மா, நன்றாக சமைப்பார். அப்பாவும் அவ்வப்போது புதிது புதிதாக ஏதாவது சமைப்பார். இவர்கள் இருவரும்தான் எனக்கு இன்ஸ்பிரேஷன்.
உணவுகளைச் சமைப்பது, சாப்பிடுவது ஆகியவற்றில் பேஷனாக இருக்க வேண்டும். அதேமாதிரி, மற்றவர்களுக்கு உணவு கொடுப்பதையும் நேசிக்க வேண்டும். இவற்றைத்தான் நல்ல செஃப் ஒருவருக்கு இருக்கவேண்டிய முக்கியமான தகுதியா நான் பார்க்கிறேன்.
'நம் வீட்டில் இருக்கும் பெண்கள் யாரும், ஒரு செஃப் பதவிக்குத் தேவையான டிகிரியையோ, சமையல் சார்ந்த வேறு படிப்புகளையோ படித்தது கிடையாது. ஆனாலும், அவர்களால் எப்படி அவ்வளவு ருசியாக சமைக்க முடிகிறது’ என்று பல தடவை நினைத்து ஆச்சர்யப்பட்டுப் போவேன். செஃப் பதவியில் இருக்கும் ஒரு நபரின் திறமையைவிட அதிக திறமை நம் இல்லத்தரசிகளிடம் இருக்கிறது. என் அம்மா செய்யும் ராஜ்மா, காதிரோல்ஸ் இவைதான் என்றென்றும் எனக்குப் பிடித்த உணவுகள். சாதம், தயிர், ஏதாவது ஒரு ஊறுகாயுடன் இவற்றைச் சாப்பிடுவதே அலாதிதான்.
இன்று சமையல் உலகில் ஏராளமான மாற்றங்கள் நிகழ்ந்துகொண்டிருக்கின்றன. உலகின் எல்லா பகுதி மக்களின் உணவுகளையும் மக்கள் சுவைக்க ஆசைப்படுகிறார்கள். அவற்றையெல்லாம் வீட்டிலும் செய்து பார்க்கிறார்கள். இது ஒரு புதுச்சுவையை மட்டும் இல்லை, நல்ல அனுபவத்தையும் கொடுக்கும். இந்தியாவில் நிறைய புகழ்பெற்ற திறமையான பெண் செஃப் இருக்கிறார்கள். என் அலுவலகத்தில்கூட ஆண்களை விட பெண் செஃப்கள்தான் அதிகம்! இன்னும் அதிகமான பெண்கள் இதில் வர வேண்டும்'' என்று சொன்ன சஞ்ஜீவ் கபூர், தன் அம்மா செய்யும் பஞ்சாபி ராஜ்மா மற்றும் தன்னுடைய ஸ்பெஷல் டிஷ், சிக்கன் செட்டிநாடு ஆகிய இரண்டு ரெசிப்பிக்களை உங்களுக்காக இங்கே தந்திருக்கிறார்.
சிக்கன் செட்டிநாடு 
தேவையானவை :
சிக்கன்  750 கிராம்
எண்ணெய்  2 டேபிள்ஸ்பூன்
பூண்டு  15 பல் (இடித்து வைத்துக்கொள்ளவும்)
வெங்காயம்  2
டொமேட்டோ ப்யூரி  75 கிராம்
கறிவேப்பிலை   25 கிராம்
செட்டிநாடு மசாலாத்தூள் 150 கிராம்
உப்பு  தேவையான அளவு
முந்திரி பேஸ்ட்  4 டேபிள்ஸ்பூன்
புளி  2 டேபிள்ஸ்பூன்
இடித்த கருப்பு மிளகு   ஒரு டீஸ்பூன்
சர்க்கரை  4 டீஸ்பூன்
நறுக்கிய கொத்தமல்லித்தழை 50 கிராம்
துருவிய தேங்காய்  1 டேபிள்ஸ்பூன்
செட்டிநாடு மசாலாத்தூள் தயாரிக்க:
எண்ணெய்   25 மில்லி
சீரகம்  ஒரு டேபிள்ஸ்பூன்
கருப்பு மிளகு  1லு டேபிள்ஸ்பூன்
மல்லி (தனியா)  1லு டேபிள்ஸ்பூன்
பச்சை ஏலக்காய்  5
இலவங்கப்பட்டை  2
கிராம்பு  3
நட்சத்திர சோம்பு  1
பெருஞ்சீரகம்  ஒரு டேபிள்ஸ்பூன்
கருப்பு ஏலக்காய்  2
கறிவேப்பில்லை  25 கிராம்
காய்ந்த மிளகாய்  5
  மீடியம் சைஸ் வெங்காயம்  2
நறுக்கிய பூண்டு  12 பல்
நறுக்கிய இஞ்சி   ஒரு டீஸ்பூன்
துருவிய தேங்காய் ஒரு டீஸ்பூன் (அலங்கரிக்க)
செய்முறை:
முதலில் செட்டிநாடு மசாலாத்தூள் தயாரிக்க வேண்டும். வாணலியில் எண்ணெயைச் சூடுபடுத்தி, மசாலாவுக்குத் தேவையானவற்றைப் போட்டு 7 நிமிடம் வதக்கவும். இதை ஆறவைத்து, ஒரு கப் தண்ணீர் சேர்த்து அரைத்துக்கொள்ளவும்.
பிறகு, எண்ணெயை வாணலியில் நன்றாக சூடுபடுத்திக்கொள்ளவும். அதில் பூண்டு, வெங்காயம் போட்டு நன்றாக வதக்கவும். இதில் டொமேட்டோ ப்யூரி, கறிவேப்பிலை சேர்த்து வதக்கவும். இதில் செட்டிநாடு மசாலாவைச் சேர்த்து நன்றாகக் கிளறி, இத்துடன் சிக்கன் சேர்த்து  2 முதல் 3 நிமிடம் வேகவிடவும்.
இதில் உப்பு, முந்திரி பேஸ்ட், புளி மற்றும் 150 மில்லி தண்ணீர் சேர்த்து நன்றாகக் கிளறி  3 முதல் 4 நிமிடம் வரை வேக விடவும். மிளகு, சர்க்கரை சேர்த்துக் கிளறவும். சிக்கன் நன்றாக வெந்ததும், கொத்தமல்லித்தழை, துருவிய தேங்காய் போட்டு அலங்கரித்து சூடாகப் பரிமாறவும்.

பஞ்சாபி ராஜ்மா
 தேவையானவை:
ராஜ்மா  150 கிராம்
ரைஸ் பிரான் ஆயில்  150 மிலி
பிரியாணி இலை  2
மீடியம் சைஸ் வெங்காயம்  2 (நறுக்கிக்கொள்ளவும்)
நறுக்கிய இஞ்சி  ஒரு டீஸ்பூன்
பூண்டுப்பல்  8  (நறுக்கிக்கொள்ளவும்)
மிளகாய்ப் பொடி  2 டீஸ்பூன்
மல்லித்தூள் (தனியாத்தூள்) ஒரு டீஸ்பூன்
மஞ்சள்தூள்  அரை டீஸ்பூன்
சீரகத்தூள்  ஒரு டீஸ்பூன்
நறுக்கிய தக்காளி  3
உப்பு  தேவையான அளவு
கரம் மசாலாத்தூள் ஒரு டீஸ்பூன்
நறுக்கிய கொத்தமல்லித்தழை ஒரு டேபிள்ஸ்பூன்
 செய்முறை:
குக்கரில் ராஜ்மாவை ஐந்து கப் தண்ணீர் ஊற்றி, ஐந்து விசில் வரும் வரை வேகவிடவும். ஆயிலை சூடுபடுத்தி இதில் பிரியாணி இலை , வெங்காயம் சேர்த்து பொன்னிறமாக வதக்கவும். இஞ்சி, பூண்டு சேர்த்து மீண்டும் வதக்கவும். அதில் மிளகாய்த்தூள், மல்லித்தூள் (தனியாத்தூள்),  மஞ்சள்தூள், சீரகத்தூள் சேர்த்துக் கிளறவும். இதில் தக்காளி, உப்பு சேர்த்து தக்காளி வேகும் வரை கொதிக்க விடவும்.
இதில் ராஜ்மா, ஆயில் சேர்த்து நன்றாகக் கிளறவும். பிறகு, அடுப்பைக் குறைத்து வைத்து 15 நிமிடம் வரை வேக விடவும். பின், உப்பு, கரம்மசாலாத்தூள் சேர்த்து 5 நிமிடம் மீண்டும் வேக விடவும். கொத்தமல்லித்தழை தூவி சாதத்துடன் பரிமாறவும்.

தேன், சாப்பிடுவது எப்படி ?

தேன், சாப்பிடுவது எப்படி ?
எடை குறைப்பதற்காக, எடை கூட்டுவதற்காக, இருமல் நிற்பதற்காக... என அன்றாடம் தேனைப் பயன்படுத்துவோரின் எண்ணிக்கை அதிகம். இந்நிலையில், நாம் கடைகளில் வாங்கிப் பயன்படுத்தும் தேன் சுத்தமானதுதானா என்பதற்கு எந்த உத்தரவாதமும் இருப்பதில்லை. எனவே, நல்ல தேனை எப்படிக் கண்டுபிடிப்பது... எப்படிச் சாப்பிடுவது? என்பது குறித்து சில தகவல்களை இங்கே பகிர்கிறார், சித்த மருத்துவர் அர்ஜுனன்.
“தேன், பல மருத்துவ குணங்களைக் கொண்டது. தேன் இல்லாமல் நமது ஆயுர்வேத மருத்துவம் இல்லை என்பது அனைவருக்கும் தெரிந்த விஷயம்தான். ஆனால், பல கடைகளில் தேன் என்று சொல்லி சர்க்கரைத் தண்ணீரைத்தான் விற்பனை செய்கிறார்கள். தேன் சாப்பிடுவது நல்லது. அதை சரியான முறையில் சாப்பிட்டால் மிகவும் நல்லது. அதனால், தேனைப்பற்றிய சில அடிப்படை விஷயங்களைத் தெரிந்து கொள்ள வேண்டியது அவசியம்.
சுத்தமான தேனை பேப்பரில் ஊற்றினால், ஊறாது. தண்ணீரில் இட்டால் கரையாமல் கம்பிபோல அடியில் போய்விடும். இதை நாய் முகராது. அதேபோல சுத்தமான தேனின் அருகில் எறும்பு வராது.
காய்ச்சிய தேன், காய்ச்சாத தேன் என்று இரண்டு வகைகள் உண்டு. தேனில் உள்ள பூவின்  மணம் போவதற்காக இரும்பைக் காய வைத்து அதை தேனில் வைப்பார்கள். இது காய்ச்சிய தேன். இது கொஞ்சம் நீர்த்திருக்கும். இதை இரண்டு ஆண்டுகளுக்குள் பயன்படுத்த வேண்டும். காய்ச்சாத தேன், மஞ்சளாக கெட்டியாக இருக்கும். ஆண்டுக் கணக்காக வைத்திருந்தாலும் கெடாது.
‘ஓடைத்தேன்’ என்பதுதான் இருப்பதிலேயே மிகவும் கெட்டியாக இருக்கும் தேன். மிகவும் இடுக்கான பகுதிகளில் இருக்கும் தேன்கூடுகளில் இருந்து இது எடுக்கப்படுகிறது. இதில் ஏதேனும் பழத்தைப் போட்டுவைத்தால், 200 ஆண்டுகளுக்குக் கூட கெடாது.  மலைவாழ் மக்கள் நிறைய பொருட்களைப் பதப்படுத்துவதற்கு இந்தத் தேனைத்தான் பயன்படுத்துவர்.  மரங்களில் இருக்கும் தேன்கூடுகள் மூலம் கிடைப்பது கொம்புத்தேன். பெரும்பாலும் கடைகளில் நமக்குக் கிடைப்பது இந்தத் தேன்தான். ஆனால், இதில் பொருட்களை அதிக நாட்கள் பதப்படுத்த முடியாது. ஆனால், இந்தத் தேன் நிறைய நாட்கள் கெடாமல் இருக்கும்.
தாம்பத்திய உறவில் சிறந்து விளங்க மலைவாழ் மக்கள் இரவு நேரத்தில் தேன் அருந்துவர். அவர்களுக்கு சளி, காய்ச்சல் இருந்தால், ஒரு ஸ்பூன் தேனைச் சாப்பிட்டுவிட்டு வெயிலில் கட்டிலைப் போட்டு போர்த்திக் கொண்டு படுக்கும் பழக்கத்தையும் கடைபிடிக்கிறார்கள்.
முகத்தில் வறட்சி, அதிகக் கொழுப்பு, குடல் சம்பந்தபட்ட  பிரச்னை எதுவாக இருந்தாலும், தேன் சாப்பிட்டால் சரியாகிவிடும். காலையில் வெறும் வயிற்றில் தேனைச் சாப்பிட்டால், தேவையில்லாத கொழுப்பு கரைந்து விடும்.
பலாப்பழமும் தேனும் கலந்து சாப்பிட  முகம் பொலிவாகும். உடலில் நீர் அதிகமாக இருப்பவர்களுக்கு தேன் ஒரு அருமருந்து.
சுடுதண்ணீரில் தேனைக் கலந்து பயன்படுத்தினால் தேனில் உள்ள மருத்துவ குணங்கள் நமக்குக் கிடைக்காது.
வயதானவர்களுக்கு தேனை தாராளமாகக் கொடுக்கலாம். சுத்தமான தேனை சர்க்கரை நோயாளிகள் சாப்பிட்டால், சர்க்கரை அளவு ஏறாது.

வெறும் தேன் குழந்தைகளுக்கு உகந்த உணவு அல்ல. அதனால், பத்து வயதுக்குப் பிறகு குழந்தைகளுக்குக் கொடுக்கத் தொடங்கலாம். ஆனால், நாட்டு மருந்து கொடுக்கும்போது... ஒரு வயது முதலே குழந்தைகளுக்கு மருந்தோடு தேனைச் சேர்த்துக் கொடுக்கலாம்” என்ற அர்ஜுனன் நிறைவாக, “எந்த வயதினராக இருந்தாலும், ஒரு நாளைக்கு ஒரு டேபிள்ஸ்பூனுக்கு மேல் தேனைச் சாப்பிடக் கூடாது. அதேபோல, தேனை நக்கித்தான் சாப்பிடவேண்டும். கண்டிப்பாக குடிக்கவோ விழுங்கவோ கூடாது. விழுங்கும்போது புரையேறினால் உயிருக்கே ஆபத்தாகி விடும். நெய்யையும் தேனையும் சம அளவு சேர்த்தால், அது விஷமாக ஆகிவிடும். மருந்து சாப்பிடும்போது சில சமயம் இவ்விரண்டையும் சேர்த்து சாப்பிட நேரிடும். அப்படி சாப்பிடும்போது ஒரு பங்கு தேனுக்கு கால் பங்கு நெய்க்கு மேல் கலக்கக்கூடாது” என்று எச்சரிக்கை செய்தார்.
- இ.ராஜவிபீஷிகா

திருமணம் - சைவ விருந்து!

திருமணம் - சைவ விருந்து
இது திருமண சீஸன். திருமண விருந்தின்போது வாழை இலையில் என்னனென்ன உணவுகள் பரிமாறப்படும் என்பதைச் செய்து காட்டி வாழை இலையில் பரிமாறியிருக்கிறார் சங்கீதா. இங்கு பரிமாறப்பட்டிருக்கும் ரெசிப்பிக்களே, உள்ளே அணிவகுத்திருக்கின்றன. வாழை இலையில் முதலில் உப்பு வைப்பதில் துவங்கி, பாயசம் வைப்பதுவரை எப்படி பரிமாறப்பட வேண்டும் என்பதை முறைப்படி இங்கே புகைப்படமாக எடுத்திருக்கிறோம்.

மாங்காய் ஊறுகாய்
தேவையானவை:

மாங்காய் -100 கிராம் (விருப்பமான சைஸில் நறுக்கவும்)
மஞ்ச‌ள்தூள் - ஒரு சிட்டிகை
உப்பு - தேவையான அளவு
மிளகாய்த்தூள் - அரை டீஸ்பூன்
எண்ணெய் - 3 டீஸ்பூன்
கடுகு - அரை டீஸ்பூன்
உளுந்து - கால் டீஸ்பூன்
கறிவேப்பிலை - சிறிதளவு
பெருங்காயத்தூள் - ஒரு சிட்டிகை
செய்முறை:

அடுப்பில் வாணலியை வைத்து எண்ணெய் ஊற்றி சூடானதும், கடுகு தாளித்து உளுந்து, கறிவேப்பிலை, பெருங்காயத்தூள் சேர்த்து பொன்னிறமாக வதக்கவும். இதில் மாங்காய்த் துண்டுகள், மஞ்சள்தூள், மிளகாய்த்தூள், உப்பு சேர்த்து மிதமான தீயில் ஒரு நிமிடம் வதக்கினால், மாங்காய் நறுக்கென இருக்கும். மிருதுவாக வரவேண்டுமானால் மேலும் ஒரு நிமிடம் கிளறி, இறக்கினால் மாங்காய் ஊறுகாய் ரெடி.

கேரட் பச்சடி
தேவையானவை:
தயிர் - 25 கிராம்
கேரட் - 2 (துருவியது)
உப்பு - தேவையான அளவு
பெருங்காயத்தூள் - கால் டீஸ்பூன்
சீரகம் - அரை டீஸ்பூன்
கொத்தமல்லித்தழை - 2 டேபிள்ஸ்பூன் (பொடியாக நறுக்கவும்)
தாளிக்க:

எண்ணெய் - அரை டீஸ்பூன்
கடுகு - அரை டீஸ்பூன்
இஞ்சி - அரை டீஸ்பூன் (பொடியாக நறுக்கவும்)
உளுந்து - அரை டீஸ்பூன்
பச்சை மிளகாய் - 2 (பொடியாக நறுக்கவும்)
செய்முறை:

ஒரு கிண்ணத்தில் தயிர், உப்பு, பெருங்காயத்தூள் சேர்த்து, முட்டை அடித்துக் கலக்கும் கரண்டியால் க்ரீம் பதத்துக்கு அடித்துக் கலக்கவும். அடுப்பில் வாணலியை வைத்து எண்ணெய் ஊற்றி, தாளிக்க வேண்டியதைச் சேர்த்துத் தாளித்து கேரட், சீரகம், கொத்தமல்லித்தழை சேர்த்து ஒரு நிமிடம் வதக்கி அடுப்பை அணைக்கவும். இதை தயிர்க்கலவையில் சேர்த்துக் கலக்கிப் பரிமாறவும்.

செளசெள கூட்டு
தேவையானவை:

செளசெள - 200 கிராம் (மீடியமான சைஸில் நறுக்கவும்)
பாசிப்பருப்பு - 100 கிராம்
கடலைப்பருப்பு - 3 டேபிள்ஸ்பூன்
மஞ்சள்தூள் - கால் டீஸ்பூன்
பெரியவெங்காயம் - 1 சிறியது (பொடியாக நறுக்கவும்)
மீடியம் சைஸ் தக்காளி - 1 (பொடியாக நறுக்கவும்)
பெருங்காயத்தூள் - ஒரு சிட்டிகை
உப்பு - தேவையான அளவு
அரைக்க:

தேங்காய்த்துருவல் - 100 கிராம்
பச்சை மிளகாய் - 2
சீரகம் - அரை டீஸ்பூன்
தாளிக்க:

எண்ணெய் - 2 டீஸ்பூன்
உளுந்து - கால் டீஸ்பூன்
காய்ந்த மிளகாய் - 3
சீரகம் - கால் டீஸ்பூன்
கறிவேப்பிலை - சிறிதளவு
கொத்தமல்லித்தழை - சிறிதளவு
கடுகு - அரை டீஸ்பூன்
செய்முறை:

கடலைப்பருப்பையும், பாசிப்பருப்பையும் இருபது நிமிடம் ஊற வைக்கவும். அரைக்கக் கொடுத்தவற்றை சிறிது தண்ணீர் ஊற்றி மிக்ஸியில் பேஸ்டாக அரைத்து வைக்கவும். பருப்புகளைத் தேவையான அளவு தண்ணீர், மஞ்சள்தூள்,பெருங்காயத்தூள் சேர்த்து லேசாக வேக வைக்கவும். குழைத்துவிட வேண்டாம். வெந்த பருப்புக் கலவையில் வெங்காயம், தக்காளி, செளசெள சேர்த்துக் கலக்கி அரைத்த விழுதைச் சேர்த்து உப்பு, தேவையான அளவு தண்ணீர் விட்டு அடுப்பில் வைத்து மிதமான தீயில் வேக விடவும். செளசெள வெந்ததும் இறக்கவும். அடுப்பில் வாணலியை வைத்து, தாளிக்கக் கொடுத்துள்ளவற்றைச் சேர்த்துத் தாளித்து செளசெளவில் சேர்த்துக் கலக்கிப் பரிமாறவும்.


முட்டைகோஸ் பொரியல்
தேவையானவை:

முட்டைகோஸ் - 25 கிராம் (பொடியாக நறுக்கவும்)
மீடியம் சைஸ் பெரியவெங்காயம் - 1 (பொடியாக நறுக்கவும்)
பச்சை மிளகாய் - 3 (கீறி விடவும்)
கறிவேப்பிலை - சிறிதளவு
கொத்தமல்லித்தழை - சிறிதளவு (பொடியாக நறுக்கவும்)
தேங்காய்த் துருவல் - 2 டேபிள்ஸ்பூன்
மஞ்சள்தூள் - கால் டீஸ்பூன்
கடுகு - அரை டீஸ்பூன்
கடலைப்பருப்பு - 1 டேபிள்ஸ்பூன்
உளுந்து - அரை டேபிள்ஸ்பூன்
எண்ணெய் - 2 டீஸ்பூன்
உப்பு - தேவையான அளவு
செய்முறை:

அடுப்பில் வாணலியை வைத்து எண்ணெய் ஊற்றி கடுகு, கடலைப்பருப்பு, உளுந்து சேர்த்து பொன்னிறமாக வதக்கவும். இதில் வெங்காயம், பச்சை மிளகாய், கறிவேப்பிலை, சேர்த்து வெங்காயம் பொன்னிறமாகும் வரை வதக்கவும். பிறகு, முட்டைகோஸ், மஞ்சள்தூள், உப்பு சேர்த்து வதக்கி, சிறிது தண்ணீர் விட்டு மூடி போட்டு குறைந்த தீயில் முக்கால் மணி நேரம் வேக விடவும்.  முட்டைகோஸ் வெந்ததும் மூடியைத் திறந்து கொத்தமல்லித்தழை, தேங்காய்த்துருவல் தூவி அடுப்பை அணைத்துப் பரிமாறவும்.

வெண்டைக்காய் வறுவல்
தேவையானவை:

வெண்டைக்காய் - 300 கிராம்
மீடியம் சைஸ் பெரிய வெங்காயம் - 1 (பொடியாக நறுக்கவும்)
கறிவேப்பிலை - சிறிதளவு
மஞ்சள்தூள் - கால் டீஸ்பூன்
மிளகாய்த்தூள் - 1 டீஸ்பூன்
சீரகத்தூள் - அரை டீஸ்பூன்
உப்பு - தேவையான அளவு
கொத்தமல்லித்தழை - சிறிதளவு  (பொடியாக நறுக்கவும்)
தேங்காய்த்துருவல் -  சிறிதளவு (விருப்பப்பட்டால்)
தாளிக்க:

எண்ணெய் - 1 டேபிள்ஸ்பூன்
கடுகு - அரை டீஸ்பூன்
கடலைப்பருப்பு - அரை டீஸ்பூன்
உளுந்து - அரை டீஸ்பூன்
பெருங்காயத்தூள் - ஒரு சிட்டிகை
செய்முறை:

அடுப்பில் வாணலியை வைத்து எண்ணெய் ஊற்றி, தாளிக்க வேண்டியதைத் தாளித்து கறிவேப்பிலை, வெங்காயம் சேர்த்து பொன்னிறமாக வதக்கவும். இதில் வெண்டைக்காய், மஞ்சள்தூள், உப்பு சேர்த்து இரண்டு நிமிடம் மிதமான தீயில் வேக விடவும். பிறகு தீயை முற்றிலும் குறைத்து, வெண்டைக்காயை மூடி போடாமல் வேக விடவும். காய் வெந்த பிறகு மிளகாய்த்தூள், சீரகத்தூள் சேர்த்து இரண்டு நிமிடம் வதக்கவும். இறுதியாக விருப்பப்பட்டால் தேங்காயைச் சேர்த்துக் கிளறி கொத்தமல்லித்தழை தூவிப் பரிமாறவும்.

உருளைக்கிழங்கு பொடிமாஸ்
தேவையானவை:

உருளைக்கிழங்கு - 4  (வேக வைத்துக் கொள்ளவும்)
பெரிய வெங்காயம் - 1 (பொடியாக நறுக்கவும்)
பூண்டு - 2 பல்  (நசுக்கிக் கொள்ளவும்)
கறிவேப்பிலை - சிறிதளவு
மிளகாய்த்தூள் - அரை டீஸ்பூன்
மஞ்சள்தூள் - கால் டீஸ்பூன்
உப்பு - தேவையான அளவு  எண்ணெய்  - முக்கால் டீஸ்பூன்
கொத்தமல்லித்தழை   - சிறிதளவு   (பொடியாக நறுக்கவும்)
தாளிக்க:

 கடுகு - கால் டீஸ்பூன்
 சோம்பு - கால் டீஸ்பூன்
 கடலைப்பருப்பு - 1 டீஸ்பூன்
 உடைத்த வெள்ளை உளுந்து - 1 டீஸ்பூன்
செய்முறை:
உருளைக்கிழங்கை தோல் நீக்கி, மீடியமான சைஸில் நறுக்கித் துண்டுகளாக்கவும். அடுப்பில் வாணலியை வைத்து எண்ணெய் ஊற்றி, தாளிக்க வேண்டியவற்றைத் தாளிக்கவும். இதில் வெங்காயம், கறிவேப்பிலை, பூண்டு சேர்த்து, வெங்காயம் பொன்னிறமாகும் வரை வதக்கி, மிளகாய்த்தூள், மஞ்சள்தூள், உப்பு சேர்த்து ஒரு நிமிடம் வதக்கவும். நறுக்கிய உருளைக்கிழங்கை சேர்த்து, உருளைக்கிழங்கில் மசாலா ஒட்டும் வரை வதக்கி கொத்தமல்லித்தழை தூவி இறக்கவும்.

மோர்க்குழம்பு
தேவையானவை:
வெண்பூசணி - 150 கிராம்
தயிர் - 100 மில்லி
மஞ்சள்தூள் - கால் டீஸ்பூன்
உப்பு - தேவையான அளவு
கொத்தமல்லித்தழை - சிறிதளவு
அரைக்க: 
கடலைப்பருப்பு - 2 டீஸ்பூன்
பச்சரிசி - 1 டீஸ்பூன்
துவரம்பருப்பு - 1 டீஸ்பூன்
தேங்காய்த்துருவல் - 25 கிராம்
பச்சை மிளகாய் - 2
சீரகம் - 1 டீஸ்பூன்
தாளிக்க:

தேங்காய் எண்ணெய் - 1 டீஸ்பூன்
கடுகு - அரை டீஸ்பூன்
உளுத்தம்பருப்பு - அரை டீஸ்பூன்
காய்ந்த மிளகாய் - 1  (உடைத்துக் கொள்ளவும்)
கறிவேப்பிலை - சிறிதளவு
செய்முறை:

தயிரை முட்டை கலக்கும் கரண்டியால் தண்ணீர் சேர்க்காமல் க்ரீம் பதத்துக்கு அடித்து வைக்கவும். கடலைப்பருப்பு, துவரம்பருப்பு, மற்றும் பச்சரிசியை கால் கப் மிதமான சூடு உள்ள தண்ணீரில், இருபது நிமிடம் ஊற வைக்கவும். ஊறிய பருப்புகள், பச்சரிசி, தேங்காய்த்துருவல், பச்சை மிளகாய், சீரகம் ஆகியவற்றை மிக்ஸியில் சேர்த்து பேஸ்டாக அரைத்து வைக்கவும். பூசணிக்காயை தோல் நீக்கி, மீடியம் சைஸில் நறுக்கி தண்ணீர் ஊற்றி வேகவைத்து எடுத்து வைக்கவும். அடுப்பில், வாணலியை வைத்து எண்ணெய் ஊற்றி சூடானதும் தாளிக்கக் கொடுத்தவற்றைத் தாளித்து, பூசணிக்காய் சேர்த்து ஒரு நிமிடம் வதக்கவும். இதில், அரைத்த விழுது, உப்பு, மஞ்சள்தூள் சிறிதளவு தண்ணீர் சேர்த்து தீயை மிதமாக்கி வேக விடவும். கலவை நுரை கட்டி வரும் போது அடுப்பை அணைத்து தயிர், கொத்தமல்லித்தழை சேர்த்துக் கலக்கி மூடி, சிறிது நேரம் கழித்துப் பரிமாறவும்.

வத்தக்குழம்பு
தேவையானவை:

சின்னவெங்காயம் - 10 (தோல் உரித்து கொள்ளவும்)
தக்காளி - 1 (பொடியாக நறுக்கவும்)
சுண்டைக்காய்/மணத்தக்காளி வத்தல் - 2 டேபிள்ஸ்பூன்
புளிக்கரைசல் - கால் கப்
பூண்டு - 10 பல்
மஞ்சள்தூள் - ஒரு சிட்டிகை
மிளகாய்த்தூள் - ஒன்றரை டீஸ்பூன்
மல்லித்தூள் (தனியாத்தூள்) - 2 டீஸ்பூன்
வெல்லம் - 1 டீஸ்பூன்
கறிவேப்பிலை - சிறிதளவு
எண்ணெய் - அரை டேபிள்ஸ்பூன்
தாளிக்க:

நல்லெண்ணெய் - 2 டேபிள்ஸ்பூன்
கடுகு - அரை டீஸ்பூன்
காய்ந்த மிளகாய் - 1
வெந்தயம் - கால் டீஸ்பூன்
உளுத்தம்பருப்பு - 1 டீஸ்பூன்
பெருங்காயத்தூள் - கால் டீஸ்பூன்
வறுத்தரைக்க:

மல்லி (தனியா) - 1 டேபிள்ஸ்பூன்
காய்ந்த மிளகாய் - 2
உளுத்தம்பருப்பு - 1 டீஸ்பூன்
உரித்த சின்ன வெங்காயம் - 5
தேங்காய்த்துருவல் - 3 டேபிள்ஸ்பூன்
எண்ணெய் - அரை டீஸ்பூன்
செய்முறை:

வறுத்து அரைக்க வேண்டியவற்றை அரை டீஸ்பூன் எண்ணெய் விட்டு வறுத்து ஆற விடவும். இதை மிக்ஸியில் சிறிது தண்ணீர் விட்டு அரைத்து வைக்கவும். சுண்டைக்காய்/மணத்தக்காளி வத்தலை அரை டேபிள்ஸ்பூன் எண்ணெய் விட்டு வறுத்து தனியாக வைக்கவும். அடுப்பில் வாணலியை வைத்து, 2 டேபிள்ஸ்பூன் எண்ணெய் விட்டு தாளிக்க வேண்டியதைச் சேர்த்துப் பொரிய விடவும். இதில் வெங்காயம், கறிவேப்பிலை சேர்த்து ஒரு நிமிடம் வதக்கி, பூண்டு சேர்த்து மேலும் ஒரு நிமிடம் வதக்கவும். இத்துடன் தக்காளியைச் சேர்த்து கரையும் வரை வதக்கி, அரைத்த விழுதைச் சேர்த்து பச்சை வாசனை போக வதக்கவும். இதில் மிளகாய்த்தூள், மல்லித்தூள், மஞ்சள்தூள், புளிக்கரைசல், தேவையான அளவு தண்ணீர் சேர்த்து மிதமான தீயில் கொதிக்க விடவும். எண்ணெய் பிரிந்து வரும் வேளையில், வறுத்த சுண்டைக்காய்/மணத்தக்காளி வற்றல், வெல்லம் சேர்த்து ஒரு நிமிடம் கொதிக்க விட்டு அடுப்பை அணைத்துப் பரிமாறவும்.

கத்திரிக்காய்+முருங்கைக்காய் சாம்பார்
தேவையானவை:

 துவரம் பருப்பு - 200 கிராம்
 கத்திரிக்காய் - 3 (சிறியது)
 முருங்கைக்காய் - 2
 சாம்பார் வெங்காயம் - 10
(தோல் நீக்கி இரண்டாக நறுக்கி வைக்கவும்)
 தக்காளி - 1 (மீடியம் சைஸில் நறுக்கவும்)
 துருவிய தேங்காய் - கால் டீஸ்பூன்
(கால் கப் தண்ணீரில் கரைத்து வைக்கவும்)
 மிளகாய்த்தூள் - அரை டீஸ்பூன்
 மல்லித்தூள் (தனியாத்தூள்) - 1 டீஸ்பூன்
 சாம்பார் பொடி - 2 டீஸ்பூன்
 உப்பு - தேவையான அளவு
 கொத்தமல்லித்தழை - சிறிதளவு
(பொடியாக நறுக்கவும்)
 விளக்கெண்ணெய் - சிறிதளவு
 புளி - சிறிய நெல்லிக்காய் அளவு
(கரைத்து வடிகட்டவும்)
தாளிக்க:

 எண்ணெய்/நெய் - 3 டீஸ்பூன்
 கடுகு - அரை டீஸ்பூன்
 சீரகம் - அரை டீஸ்பூன்
 சோம்பு - அரை டீஸ்பூன்
 பெருங்காயத்தூள் - ஒரு சிட்டிகை
 கறிவேப்பிலை - சிறிதளவு
செய்முறை:

துவரம் பருப்பைக் கழுவி தண்ணீர் ஊற்றி, சில சொட்டுக்கள் விளக்கெண்ணெய் விட்டு, வேக வைத்து, தனியாக வைக்கவும். காய்கறிகளைக் கழுவி விருப்பமான வடிவத்தில் நறுக்கி தனியாக வைக்கவும். அடுப்பில் வாணலியை வைத்து ஒரு டீஸ்பூன் எண்ணெய் ஊற்றி வெங்காயத்தைச் சேர்த்து இரண்டு நிமிடம் வதக்கி, தக்காளியைச் சேர்த்து கரையும் வரை வதக்கவும். இதில் கத்திரிக்காய், முருங்கைக்காய் சேர்த்து ஒரு நிமிடம் வதக்கி, மிளகாய்த்தூள், மல்லித்தூள் (தனியாத்தூள்), சாம்பார் பொடி சேர்த்து ஒரு நிமிடம் வதக்கவும். வேக வைத்த துவரம் பருப்பை இதில் சேர்த்து தேவையான அளவு தண்ணீர், உப்பு, கொத்தமல்லித்தழை, துருவிய தேங்காய் சேர்த்து மூடி போட்டு, காய்கறிகள் வேகும் வரை மிதமான தீயில் வைக்கவும். காய்கறிகள் வெந்ததும் புளிக்கரைசல் ஊற்றி இரண்டு நிமிடம் கழித்து, அடுப்பை அணைத்து விடவும். அடுப்பில் வாணலியை வைத்து மீதம் இருக்கும் எண்ணெயை ஊற்றி தாளிக்கக் கொடுத்தவற்றைச் சேர்த்துத் தாளித்து சாம்பாரில் ஊற்றிக் கலக்கிப் பரிமாறவும்.

பருப்பு ரசம்
தேவையானவை:

துவரம் பருப்பு - 100 கிராம்
மிளகு - கால் டீஸ்பூன்
சீரகம் - அரை டீஸ்பூன்
பூண்டு - 2 பல்
காய்ந்த மிளகாய் - 4
மஞ்சள்தூள் - கால் டீஸ்பூன்
கறிவேப்பிலை - சிறிதளவு
கொத்தமல்லித்தழை  - சிறிதளவு  (பொடியாக நறுக்கவும்)
மீடியம் சைஸ் தக்காளி - 1
பெருங்காயத்தூள்  - கால் டீஸ்பூன்
ரசப்பொடி - 1 டீஸ்பூன்
கடுகு - அரை டீஸ்பூன்
எண்ணெய் - ஒரு டீஸ்பூன்
உப்பு - தேவையான அளவு
செய்முறை:

துவரம் பருப்பை மஞ்சள்தூள் சேர்த்து வேக வைத்து மசித்து வைக்கவும். மிளகு, சீரகம், பூண்டு முதலியவற்றை நசுக்கிக் கொள்ளவும். அடுப்பில் வாணலியை வைத்து, எண்ணெய் ஊற்றி கடுகு, காய்ந்த மிளகாய் சேர்த்துத் தாளித்து, பூண்டு, சீரகம், மிளகு, கறிவேப்பிலை, பெருங்காயத்தூள் சேர்த்து வதக்கவும். இதில் தக்காளியைச் சேர்த்து கரையும் வரை வதக்கி, வெந்த துவரம் பருப்பு, ரசப்பொடி, உப்பு, சிறிது தண்ணீர் சேர்த்து மிதமான தீயில் வேக விடவும். ரசம் நுரை கட்டி வரும் போது அடுப்பை அணைத்து கொத்தமல்லித்தழை தூவி, ரசத்தை மூடி போட்டு சிறிது நேரம் கழித்துப் பரிமாறவும்.


சேமியா பாயசம்
தேவையானவை:

சேமியா - 50 கிராம்
பால் - ஒரு லிட்டர்
சர்க்கரை - 100 கிராம்
குங்குமப்பூ - 2
முந்திரி - 15
திராட்சை (கிஸ்மிஸ் பழம்) - 8
ஏலக்காய்த்தூள் - 1 டீஸ்பூன்
தேங்காய்த்துண்டுகள்  - 2 டேபிள்ஸ்பூன்  (பொடியாக நறுக்கவும்)
நெய் - 2 டீஸ்பூன்
செய்முறை:

அடுப்பில் எண்ணெய்ச் சட்டியை வைத்து, நெய் ஊற்றி முந்திரி, தேங்காய்த்துண்டுகள் சேர்த்து பொன்னிறமாக வறுத்து தனியாக வைக்கவும். இதே எண்ணெய்ச் சட்டியில் திராட்சை (கிஸ்மிஸ் பழம்), சேமியா ஆகியவற்றை தனித்தனியாக வறுத்துத் தனியாக வைக்கவும். கனமான அடிப்பகுதியுள்ள வாணலியை அடுப்பில் வைத்து பாலை ஊற்றிக் கொதிக்க விடவும். பால் கொதிக்க ஆரம்பித்ததும் தீயை மிதமாக்கி, இரண்டு நிமிடம் கழித்து, வறுத்த சேமியா, குங்குமப்பூ சேர்த்து மூன்று நிமிடம் கொதிக்க விடவும். சேமியா அதிகம் வெந்துவிட்டால் பாயசம் கஞ்சி போல கெட்டியாகிவிடும். சேமியா முக்கால் பதம் வெந்தததும், சர்க்கரை சேர்த்து மூன்று நிமிடம் கொதிக்க விடவும். இதில் ஏலக்காய்த்தூள், முந்திரி, திராட்சை (கிஸ்மிஸ்), தேங்காய்த்துண்டுகள் சேர்த்துக் கலக்கி அடுப்பை அணைத்து ஆற வைத்துப் பரிமாறவும்.


மசாலா பருப்பு வடை
தேவையானவை:

பட்டாணிப் பருப்பு - 1 கப்
கடலைப்பருப்பு - அரை கப்
சோம்பு - அரை டேபிள்ஸ்பூன்
பச்சை மிளகாய் - 5
இஞ்சி - 1 துண்டு (பொடியாக நறுக்கவும்)
மீடியம் சைஸ் பெரிய வெங்காயம் - 1(பொடியாக நறுக்கவும்)
கறிவேப்பிலை - சிறிதளவு (பொடியாக நறுக்கவும்)
கொத்தமல்லித்தழை  - சிறிதளவு (பொடியாக நறுக்கவும்)
உப்பு - தேவையான அளவு
எண்ணெய் - பொரிக்கத் தேவையான அளவு
செய்முறை:

பட்டாணி மற்றும் கடலைப்பருப்பை தண்ணீர் ஊற்றி இரண்டு மணி நேரம் ஊற வைக்கவும். பின் தண்ணீர் வடித்து, பச்சை மிளகாய், அரை டீஸ்பூன் சோம்பு, சிறிது தண்ணீர் சேர்த்து மிக்ஸியில் கொரகொரப்பாக அரைத்து வைக்கவும். அரைத்தவற்றை ஒரு கிண்ணத்தில் சேர்த்து எண்ணெய் நீங்கலாக மீதம் இருக்கும் பொருட்களை எல்லாம் சேர்த்து மொத்தமாக உருட்டி வைக்கவும். கனமான அடிப்பகுதியுள்ள வாணலியை அடுப்பில் வைத்து எண்ணெய் ஊற்றி, மிதமான தீயில் வைக்கவும். எண்ணெய் சூடானதும், வாழை இலையில் எண்ணெய் தடவி வடைகளாகத் தட்டி எண்ணெயில் இட்டு, பொரித்து எடுக்கவும். சட்னியுடன் சாப்பிட மிகவும் சுவையாக இருக்கும்.

உளுந்த வடை
தேவையானவை:

உளுந்து - 150 கிராம்
அரிசி மாவு - 1 டேபிள்ஸ்பூன்
மிளகு - 1 டீஸ்பூன்
மீடியம் சைஸ் பெரிய வெங்காயம் - 1 (பொடியாக நறுக்கவும்)
பச்சை மிளகாய் - 5 (பொடியாக நறுக்கவும்)
கறிவேப்பிலை - சிறிதளவு (பொடியாக நறுக்கவும்)
கொத்தமல்லித்தழை - 1 டேபிள்ஸ்பூன் (பொடியாக நறுக்கவும்)
இஞ்சி - ஒரு துண்டு (பொடியாக நறுக்கவும்)
உப்பு - தேவையான அளவு
எண்ணெய் - பொரிக்கத் தேவையான அளவு
செய்முறை:

உளுந்தை மூன்று மணி நேரம் ஊற வைக்கவும். பிறகு தண்ணீரை வடித்து, மிளகு சேர்த்து நைஸாக அரைத்து வைக்கவும். மாவு தண்ணீரில் மிதக்கும் பதமே சரியான வடை பதம். இதில் அரிசி மாவு, வெங்காயம், இஞ்சி, பச்சை மிளகாய், கறிவேப்பிலை, உப்பு, கொத்தமல்லித்தழை சேர்த்துக் கலக்கவும். அடுப்பில் கடாயை வைத்து எண்ணெய் ஊற்றி, மிதமான தீயில் சூடுபடுத்தவும். உள்ளங்கையில் தண்ணீர் தடவி, எலுமிச்சை அளவு உருண்டையை உள்ளங்கையில் வைத்து வடையாகத் தட்டி, எண்ணெயில் இட்டு வேக விடவும். இருபுறமும் பொன்னிறமாக வெந்ததும் எடுத்துப் பரிமாறவும்.

சுய்யம்
தேவையானவை:

மைதா - 5 டேபிள்ஸ்பூன்
கடலைப்பருப்பு - 150 கிராம்
வெல்லம் - 100 கிராம்
ஏலக்காய் - 5 (தூளாக்கிக் கொள்ளவும்)
முந்திரி, பாதாம் பருப்பு - சிறிதளவு (பொடியாக நறுக்கி கொள்ளவும்)
உப்பு - கால் டீஸ்பூன்
பேக்கிங் சோடா - ஒரு சிட்டிகை
மஞ்சள்தூள் - ஒரு சிட்டிகை
எண்ணெய் - பொரிக்க‌த்தேவையான அளவு
செய்முறை:

கடலைப்பருப்பை குக்கரில் சேர்த்து வேக வைத்து தண்ணீரை வடித்து ஆற வைக்கவும். வெல்லத்தை பொடித்து வைக்கவும். இதில் வேக வைத்த கடலைப்பருப்பைச் சேர்த்து கொரகொரப்பாக ஓட்டி எடுக்கவும். தண்ணீர் சேர்க்க வேண்டாம். இதை ஒரு கிண்ணத்தில் மாற்றி முந்திரிப்பருப்பு, பாதாம்பருப்பு சேர்த்துக் கிளறி, சிறிய எலுமிச்சை வடிவ உருண்டைகளாக உருட்டி வைக்கவும். வாய் அகன்ற பாத்திரத்தில் மைதா, மஞ்சள்தூள், பேக்கிங் சோடா, உப்பு, ஏலக்காய்த்தூள் தேவையான அளவு தண்ணீர் சேர்த்து போண்டா மாவு பதத்துக்குக் கரைத்து வைக்கவும். அடுப்பில் கனமான அடிப்பகுதியுள்ள வாணலியை வைத்து எண்ணெய் ஊற்றி சூடானதும், உருட்டிய பருப்பு உருண்டையை எடுத்து மைதாவில் முக்கி எண்ணெயில் மெதுவாக இட்டு வேக விடவும். சுய்யம் பிரவுன் நிறம் ஆனதும், ஜல்லிக்கரண்டியால் எடுத்து பேப்பர் டவலில் வைத்து ஆற விட்டுப் பரிமாறவும். இப்படி மீதம் இருக்கும் அனைத்து உருண்டைகளையும் வேகவிட்டு எடுக்கவும்.

இனிப்பு உளுந்து வடை
தேவையானவை:

முழு உளுந்து - 150 கிராம்
சர்க்கரை - 100 கிராம்
ஏலக்காய் - 3
உப்பு - ஒரு சிட்டிகை
எண்ணெய்   - பொரிக்க‌த் தேவையான அளவு
செய்முறை:

உளுந்தைக் கழுவி மூன்று மணி நேரம் ஊற வைக்கவும். பின் தண்ணீர் வடித்து மிக்ஸியில் சர்க்கரை, ஏலக்காயோடு சேர்த்து தண்ணீர் இல்லாமல் பேஸ்டாக அரைக்கவும். தேவைப்பட்டால், தண்ணீரை லேசாகத் தெளித்துக் கொள்ளலாம். மாவை ஒரு பாத்திரத்தில் மாற்றி உப்பு சேர்த்துக் கலக்கவும். அடுப்பில் வாணலியை வைத்து எண்ணெய் ஊற்றி சூடானதும், தீயை மிதமாக்கவும். இனி, உள்ளங்கையில் தண்ணீர் தொட்டு மாவை எடுத்து, உள்ளங்கையில் வைத்து வடை வடிவத்துக்கு தட்டி எண்ணெயில் விட்டு, இரண்டு பக்கமும் பொன்னிறமாக வேக விட்டு எடுத்து கிச்சன் டவலில் வைக்கவும். அதிகப்படியான எண்ணெய் உறிஞ்சப்பட்ட பிறகு இதை வாழைப்பழத்துடன் பரிமாறவும். வடை செய்த பிறகு இரண்டு மணி நேரம் கழித்து பரிமாறினால் சுவை அதிகமாகும்.